ಹೊಸನಗರ ತಾಲ್ಲೂಕಿನೆಲ್ಲೆಡೆ ಅಬ್ಬರಿಸುತ್ತಿದೆ ಮಳೆ - ಮಾಸ್ತಿಕಟ್ಟೆಯಲ್ಲಿ ರಾಜ್ಯದಲ್ಲೇ ಅತ್ಯಧಿಕ 300 ಮಿಲಿ ಮೀಟರ್ ದಾಖಲೆ ಮಳೆ

ಹೊಸನಗರ : ಮಲೆನಾಡಿನ ತವರೂರು, ರಾಜ್ಯದ ಪ್ರಮುಖ ಜಲಾಶಯ ಲಿಂಗನಮಕ್ಕಿಗೆ ನೀರುಣಿಸುವ ಪ್ರಧಾನ ಜಲಾನಯನ ಪ್ರದೇಶವಾದ ಹೊಸನಗರ ತಾಲ್ಲೂಕಿನೆಲ್ಲೆಡೆ ಬುಧವಾರ ದಾಖಲೆ ಮಳೆಯಾಗಿದ್ದು, ಲಿಂಗನಮಕ್ಕಿ ಜಲಾಶಯದಲ್ಲಿ ಒಂದೇ ದಿನ ದಾಖಲೆಯ ಐದು ಅಡಿಗಳಷ್ಟು ನೀರು ಸಂಗ್ರಹವಾಗಿದೆ. ಶರಾವತಿ ನದಿಯ ಇಕ್ಕೆಲಗಳ ಹಳ್ಳಕೊಳ್ಳ ಭರ್ತಿಯಾಗಿದ್ದು, ಉಪನದಿಗಳು ರಭಸದಿಂದ ಹರಿಯುತ್ತಿವೆ.

ಇಂದು ಬೆಳಿಗ್ಗೆ ಎಂಟು ಗಂಟೆಗೆ ಅಂತ್ಯಗೊಂಡ 24 ಗಂಟೆಗಳ ಅವಧಿಯಲ್ಲಿ ತಾಲ್ಲೂಕಿನ ಮಾಸ್ತಿಕಟ್ಟೆಯಲ್ಲಿ ದಾಖಲೆಯ 300 ಮಿಲಿ ಮೀಟರ್ ಮಳೆ ಬಿದ್ದಿರುತ್ತದೆ.

ಉಳಿದಂತೆ ತಾಲ್ಲೂಕಿನ ಮಾಣಿಯಲ್ಲಿ 290 ಮಿಲಿ ಮೀಟರ್, ಬಿದನೂರು ನಗರದಲ್ಲಿ 273 ಮಿಲಿ ಮೀಟರ್, ಹುಲಿಕಲ್ಲಿನಲ್ಲಿ 267 ಮಿಲಿ ಮೀಟರ್‌‌, ಯಡೂರಿನಲ್ಲಿ 206 ಮಿಲಿ ಮೀಟರ್, ಕಾರ್ಗಲ್ಲಿನಲ್ಲಿ 192.8 ಮಿಲಿ ಮೀಟರ್‌, ಹೊಂಬುಜದಲ್ಲಿ 120.2 ಮಿಲಿ ಮೀಟರ್, ಹೊಸನಗರ ಪಟ್ಟಣದಲ್ಲಿ 91 ಮಿಲಿ ಮೀಟರ್, ರಿಪ್ಪನ್‌ಪೇಟೆಯಲ್ಲಿ 44.2 ಮಿಲಿ ಮೀಟರ್, ಅರಸಾಳಿನಲ್ಲಿ 37.8 ಮಿಲಿ ಮೀಟರ್ ಮಳೆ ಬಿದ್ದಿರುತ್ತದೆ.

1819 ಅಡಿ ಗರಿಷ್ಠ ಮಟ್ಟದ ಲಿಂಗನಮಕ್ಕಿ ಜಲಾಶಯದ ನೀರಿನ ಮಟ್ಟ ಗುರುವಾರ ಬೆಳಿಗ್ಗೆ ಎಂಟು ಗಂಟೆಗೆ 1760.10 ಅಡಿ ತಲುಪಿದ್ದು, ಜಲಾಶಯಕ್ಕೆ 60, 238 ಕ್ಯೂಸೆಕ್ಸ್ ನೀರು ಹರಿದು ಬರುತ್ತಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಜಲಾಶಯದ ನೀರಿನ ಮಟ್ಟ 1741.70 ಅಡಿ ದಾಖಲಾಗಿತ್ತು.